ਝਰਨੇ ਨਾਲ ਗੱਲਾਂ's image
2 min read

ਝਰਨੇ ਨਾਲ ਗੱਲਾਂ

Dhani Ram ChatrikDhani Ram Chatrik
0 Bookmarks 140 Reads0 Likes


ਪ੍ਰਸ਼ਨ-

ਝਰਨਿਆ ਯਾਰਾ ! ਕਿਨ੍ਹਾਂ ਵਹਿਣਾਂ 'ਚ ਰੁੜ੍ਹਿਆ ਜਾ ਰਿਹੋਂ ?
ਬੇ-ਮੁਰਾਦੇ ਦਿਲ ਤਰਾਂ, ਗੋਤੇ ਤੇ ਗੋਤੇ ਖਾ ਰਿਹੋਂ ?
ਪੱਥਰਾਂ ਤੇ ਮਾਰ ਸਿਰ, ਕੀ ਕੀਰਨੇ ਤੂੰ ਕਰ ਰਿਹੋਂ ?
ਏਹ ਤਸੀਹੇ ਰਾਤ ਦਿਨ ਕਿਸ ਦੀ ਲਗਨ ਵਿਚ ਜ਼ਰ ਰਿਹੋਂ ?
ਗੇੜ ਵਿਚ ਹਰਦਮ ਰਹਿਣ ਦੀ ਕੀ ਤੂੰ ਇੱਲਤ ਲਾ ਲਈ ?
ਰਾਹ ਵਿਚ ਗੋਡਾ ਨਿਵਾਉਣ ਦੀ ਹੈ ਸਹੁੰ ਕਿਉਂ ਖਾ ਲਈ ?
ਸੱਚ ਦਸ, ਕਿਸ ਸਿੱਕ ਨੇ ਲੂੰ ਲੂੰ ਤੇਰਾ ਤੜਫਾਇਆ ?
ਭਾਲ ਕਿਸ ਦੀ ਕਰਨ, ਪੱਥਰ ਪਾੜਦਾ ਤੂੰ ਆਇਆ ?
ਦਰਦ ਕਿਸ ਦੀ ਚੀਸ ਹੈ, ਦਿਲ-ਚੀਰਵੇਂ ਇਸ ਸ਼ੋਰ ਵਿਚ ?
ਲੋਰ ਹੈ ਕਿਸ ਇਸ਼ਕ ਦਾ, ਇਸ ਬੇ-ਮੁਹਾਰੀ ਤੋਰ ਵਿਚ ?

ਉਤਰ-

ਲੇਖ ਵਿਚ ਮੇਰੇ ਧੁਰੋਂ ਪੱਲੇ ਪਈ ਇਹ ਤੋਰ ਹੈ,
ਤੋਰ ਵਿਚ ਹੀ ਜ਼ਿੰਦਗੀ ਦਾ ਮਰਮ ਕਰਦਾ ਸ਼ੋਰ ਹੈ ।
ਉਮਰ ਦੇ ਘੜਿਆਲ ਦੀ ਸੂਈ ਤਰਾਂ ਨਿੱਤ ਚੱਲਣਾ,
ਹੌਸਲਾ ਨਾ ਹਾਰਨਾ ਅਰ ਚਾਲ ਨੂੰ ਨਾ ਠੱਲ੍ਹਣਾ ।
ਵਧਦਿਆਂ ਜਾਣਾ ਅਗੇਰੇ, ਮੁੜ ਨ ਪਿੱਛੇ ਤੱਕਣਾ,
ਮੁਸ਼ਕਲਾਂ ਨੂੰ ਮਲਦਿਆਂ ਪੈਰਾਂ ਤਲੇ, ਨਾ ਥੱਕਣਾ ।
ਅੱਖ ਦਰਯਾ ਕੇਰਵੀਂ ਮੇਰੀ ਬਹਾਰਾਂ ਲਾ ਰਹੀ,
"ਹਾਂ, ਵਧੇ ਚੱਲੋ" ਪੁਕਾਰਾਂ ਚਾਲ ਮੇਰੀ ਪਾ ਰਹੀ ।
ਮੈਂ ਇਸੇ "ਦ੍ਰਿੜ੍ਹ ਚਾਲ" ਤੋਂ ਪਾਈਆਂ ਮੁਰਾਦਾਂ ਸਾਰੀਆਂ,
ਸਿੱਖਿਆ ਮੇਰੇ ਚੱਲਣ ਤੋਂ, ਹੌਸਲਾ ਸੰਸਾਰੀਆਂ ।

No posts

Comments

No posts

No posts

No posts

No posts