Nafrat na haqaarat na tanz zani ho guftagu men

Nafrat na haqaarat na tanz zani ho guftagu men

Jaisi hoti hai ibadat saaf dil ki vuzu men

 

Ai ghamkhwaro, ranj o alam ki gehrayi jaan lo

Ek sumundur daroon hai har qatra e aansu men

 

Kabhi ghunche se puchhiye kya maaloom hai usey

Mehakti hai yaad uski har gul ki khushbu men

 

Ai tamannaon ke aashiqo, zara dil ka bhi socho

Uski aag hogi kaisi, jab sulagta hai shola aarzu men

 

Shaikh, daaman per lagey daagh se ghabrata hai tu, phir

Pursish yeh kaisi, kya rakha hai jaama e aabru men

 

Tere aashiyaan ko chhu kar jo guzarta hai darya

Talatum nahin, rahm dilli hai us mehr e ju men

 

Ai hukmiranon, maghrur kis liye jaavidaan tum ho nahin

Firasatmand keh laogey gar ana ho tumhari qaabu men

 

Chahchaana hai behtar chillaney se, naaseh

Sada e bulbul na sahi, zabaan shirin ho gulu men

 

Sukoon o taskeen ke mushtaaq to hain sab, magar

Waisi tapish bhi to chaahiye us justaju men

 

’Sahil’, tu kehta hai jaadu hai zabaan e Urdu men

Phir yeh bhi bata de, kya mojaza hai lafz e hu men

 

Ghamkhwaro comforters. Sympathizers

Haqaarat. Disdain

Tanz zani. Cynicism

Vuzu. Ablution

Daroon. Inside. Within

Ghunche. Bud

Pursish. Puchhna

Jaama e aabru. Izzat ka pairahan

Talatum. Storm

Mehr e ju. Mercy of the River

Javidaan immortal

Firasatmand. Wise

Sad. Aawaaz

Shirin. Meethi

Gulu. Gala

Mushtaaq. Desirous of

Tapish heat. Desire

Lafz e hu. God Himself