Kya hua tha Kya hua tha

Jangal me'n shor macha tha, kya hua tha kya hua tha?

Aag lagi thi dhua'n utha tha, kya hua tha kya hua tha?

Maine dekha tha pedo'n pe kayi gho'nsle khaali the, 

Panchhiyo'n ka jhund uda tha, kya hua tha kya hua tha?

Vo bola ke raqeeb se uska koi matlab nahi raha ab,

Phir vo usse kyu'n mila tha, kya hua tha kya hua tha?

Jisne khuddari ke chakkar me'n hire bhi thukraye vo, 

Chand sikko me'n bika tha, kya hua tha kya hua tha?

Jiski zaat hai behaya'ai, Jiska mazhab bewafa'ai, 

Usne mujhko kyu'n chaha tha, kya hua tha kya hua tha?

Tukde tukde hokar ke ek cheez padi thi kone me'n,

Dil tha ya sheesha gira tha, kya hua tha kya hua tha?