यो सहर - भूपिन ब्याकुल's image
Nepali Poetry2 min read

यो सहर - भूपिन ब्याकुल

Bhupin ByakulBhupin Byakul June 16, 2020
Share0 Bookmarks 47 Reads0 Likes

यो सहर कहिल्यै मेरो गाउँ पुग्यो भने

सुन्नेछ

उसले यौवनभरि एकान्तमा गाएका प्रिय गीतहरु

जसलाई मैले लगेर गाएको थिएँ गाउँमा

यो सहर कहिल्यै मेरो गाउँ पुग्यो भने

देख्नेछ

उसले जीवनभरी कल्पेको प्रेमको आकाश

जसलाई मैले लगेर टाँगेको थिएँ गाउँमा

पुग्छ पुग्दैन थाह छैन

तर यो सहर कहिल्यै मेरो गाउँ पुग्यो भने

र टेक्यो भने मेरो पुरानो घरको दैलो

थाह पाउनेछ

कसरी गजबार लगाएको दैलोलाई मैले

उसको एकै स्पर्शमा उघ्रिन सिकाएको छु !

कसरी एकाएक खुल्नेछ उसको आँखाले

कुनै चाबीले खोल्न नसकेको एउटा गोप्य बाकस

जसभित्र देखिनेछ

उसले जीवनभरी खोजिरहेको

उसैको थुनिएको आत्मा

र एउटा

मौनता शीर्षको कविता

जसको पहिलो पङ्त्तिमा लेखिएको हुनेछ

‘म मौन बन्न चाहन्छु

केवल तिमीलाई सत्य बताउनका लागि !’

पुग्छ / पुग्दैन थाह छैन

तर कुनै दिन यो सहर मेरो गाउँ पुग्यो भनेँ

भेट्नेछ-

हजार पटक बोलेर पनि सत्य बनाउन असफल

मौनताको पूजा गरिरहेको उसको प्रेमीलाई !

No posts

Comments

No posts

No posts

No posts

No posts